| 23/09/2008 (TUE) 太陽報
倔強攞女後來居上 楊怡接棒變萬人迷
陳寶珠o黎喇！
幾十年前o既o野，唔通翻Hit？
包剪堦呢排睇到o的似曾相識o既場面，邊個咁勁？就係佢囉！
攞女楊怡風頭一時無兩，出親活動，Fans例必蜂擁而至；楊怡一埋身，佢o地就拉手拉腳，搞到楊怡滿手爪痕。
不過咁，就算周身「痕」又有乜所謂o丫！正如包剪堦之前話齋，徐子珊點解咁多敵人，都係同樣道理，呢o的係人紅o既現象。
楊怡o的Fans湧埋o黎，又同「陳寶珠o黎喇」有乜關係？咪就係「似」囉！
仲記唔記得，楊怡出道時拍《婚前昏後》，同張可頤合作得以嶄露頭角，就係多得「翻版張可頤」呢個封號。
又記唔記得，張可頤拍《難兄難弟》扮陳寶珠，連寶珠姐都話似到十足。
大好形勢 功虧一簣
一個翻版陳寶珠，一個翻版張可頤，打著算盤、拉o下關係，楊怡都算得係再版陳寶珠啦！講到似，張可頤「扮」寶珠姐的確好似，但楊怡即使唔「扮」有唔少角度仲似；所以話見到楊怡畀Fans擁住圍住，確有寶珠姐當年風範o架！
寶珠姐曾紅透半邊天，張可頤亦係視后級數，咁楊怡有冇機會接力攀上高峰呢？
以目前o黎睇，似乎遙不可及，但以邏輯推論，張可頤接寶珠姐棒，楊怡接張可頤棒，亦係大有可能。
《家好月圓》o既老戲骨加少壯派，掀起追劇熱潮，荷媽司棋姐、Sa姨關菊英、紅姨米雪，人見人讚不在話下，但中段殺出個啞女陳法拉同攞女楊怡，尤其係楊怡，大有當年《金枝慾孽》玉瑩小主黎姿後上殺退如妃鄧萃雯之勢。
可惜楊怡大好形勢，始終功虧一簣，竟然冇份爭女主角，只能爭女配角，嘩！網上即時鋪天蓋地聲援，抱不平之聲不絕於耳。
唔緊要！雖然今年只係陪太子讀書，同女主角擦身而過，不過觀眾眼睛係雪亮o既，佢o地o既聲音，佢o地o既鼓勵，已經代表一切。
時來運到 攀上高峰
有意栽花花不發，無心插柳柳成陰，世事往往出人意表。
無線好明顯係想造就林峰同鍾嘉欣做視帝視后，林峰個管家仔會唔會殺低Jo飽夏雨仲係未知之數，但鍾嘉欣好明顯配合唔到既定o既指標，觀眾愈睇愈火滾，相反楊怡就突圍而出，唔單止網友口碑載道，觀眾都愛到發燒。
幾時都話謀事在人，成事在天。鍾嘉欣刻意造就但無功而還，楊怡誤打誤撞竟後來居上，你話係咪勉強冇幸福呢！
楊怡冇份爭視后，唔緊要，佢已經係觀眾心目中o既視后；冇份坐視后寶座，唔緊要，佢遲早會接張可頤棒坐正；未登演藝高峰，唔緊要，佢總有一日可觸摸寶珠姐o既成果。
楊怡出道7年，外形宜古宜今，率性才女、未婚媽媽、深情警花、壞透女人，以至倔強攞女，角色多變，佢亦漸入佳境；當遇上攞女呢個角色，大熟大勇o既楊怡，自然發揮得淋漓盡致。
寶珠姐有o既係一份英氣，張可頤有o既係一份傻氣，楊怡有o既係一份傲氣，佢o既能夠成功，乃因擁有一股獨特o既氣度。不過正所謂天時地利人和，做明星始終運氣居首，當楊怡交上呢份運氣o既時候，自然美麗在望，前路一片光明。
有朝一日，「楊怡o黎喇！」問o下變成萬人迷o既攞女，係咪好悅耳動人呢？
|